بالاجالار اوچون حکایه: آیتهنله آنارین ناغیلی
آیتنین گؤزلری قارادی. بؤیورتکهن کیمی. آنارین گؤزلری یومرودو. یوپیومرو. ایکی داملا مورببه کیمی. اونلارین ایکیسی ده بالاجادی. باپبالاجا. بیر گون بو دوستلارین هرهسی بیر تیسباغا تاپدی. گؤلون ساحلینی گزهنده گؤردولر کی، تیسباغالار یاواش-یاواش گؤله گیرمک ایستییر. اصلینده تیسباغالار اوشاقلاردان قاچیردی. اما نئیلهمک اولار، یئریشلری چوخ آستا اولدوغوندان قاریشقادان دا یاواش یئرییردیلر. اولجه آنار تیسباغانین بیرینی قوجاغینا گؤتوردو، سونرا آیتن ده اورکلهندی، تئز او بیری تیسباغانی قوجاغینا گؤتوردو. سونرا آیتن دئدی:
-کیمین تیسباغاسی قشنگدیر؟ آنارین یومرو گؤزلری ائله پاریلدادی کی، ائله بیل ایندیجه بیشمیش مورببه داملاسیدی. چوپور تیسباغانی قاباغا اوزادیب دئدی:
-البته منیمکی قشنگدیر! آیتن آغ توپپوش اللئری ایله برک-برک توتدوغو یاستی داشا اوخشایان تیسباغاسینی سینهسینه سیخدی. تیسباغانین قارماق کیمی ایری دیرناقلاری هاوادا آچیلا قالمیشدی. او، قارا بؤیورتکهن گؤزلرینی تیسباغاسینا زیللهییب دئدی:
-منیمکی لاپ گؤزلدی، هئچ اونا تای تاپیلماز! آنارین سسی تیترهدی:
-منیمکی ائو بویدا گؤزلدی!
-منیمکی بو کوچه بویدا گؤزلدی!
-منیمکی باکی بویدا گؤزلدی!
-منیمکی دونیا بویدا گؤزلدی!
-منیمکی ده... منیمکی ده...
آیتن دئمهیه سؤز تاپمادی. بیلمهدی نه بویدا دئسین کی، آنارینکیندان بؤیوک اولسون. اونلار کوسوشدولر. هره اؤز تیسباغاسینی گؤتوروب گئتدی. آخشاموستو آنار دوستوندان کوسدویو اوچون پئشمان اولدو. اوریینده فیکیرلشدی کی، قوی آیتهنین تیسباغاسی قشنگ оلسون. آنار آیتهنه زنگ ائتدی:
-آیتن، منهم، آناردی. آیتن دوستونون زنگیندن چوخ سئویندی. آنار دئدی:
-آیتن، سنین تیسباغان لاپ گؤزلدی! دونیا بویدا. لاپ اوندان دا چوخ!
آیتن دئدی:
-یوخ، سنین تیسباغان گؤزلدی، دونیا بویدا، لاپ اوندان دا چوخ. آنار دئدی:
-قوی سنین تیسباغان گؤزل اولسون، آیتهن! آیتهن دئدی:
-یوخ، قوی سنین تیسباغان گؤزل اولسون! هه، سؤزلری یئنه د ا دوز گلمهدی. آنارین مورببه داملاسینا اوخشایان گؤزلرینین ایشیغی بیر آز آزالان کیمی اولدو. آیتنین قارا بؤیورتکهن گؤزلرینین قارالیغی بیر آز آزالان کیمی اولدو. هه، ایشلر چتینلشدی. ایندی بیز نئیلیک؟