لغات ترکی
قورباغا ايله كپنك
سويود آغاجي سويا يئتيشن يئرده ؛ بير باراما قوردو ايله قورباغا بالاسي بير بيرلرين گؤردولر.
اونلار بير بير لرينين اینجه نارین گؤزلرينه باخيب سئويشديلر.
باراما قوردو قورباغابالاسينين گؤي قورشاغي سي اولدو .
قورباغا بالاسي ايسه باراما قوردونون قارا پارلاق شووه سي.
قورباغا بالاسي دئدي :‹‹ من سني باشدان آياقينا، بوتون سئويرم .››
قورد دئدي: ‹‹منده سني باشدان آياقينا سئويرم سؤز وئر هئچ دگيشمه يه جكسن .››
قورباغا بالاسي دئدي: ‹‹سؤز وئريرم››
آمما قورباغا بالاسي سؤزونون اوستونده دايانا بيلمه دي، او دگيشيلدي دوز نئجه هاوا دگيشيلر كيمي.
صونرا اونلار بير بيرلرين يئنه گؤرنده قورباغا بالاسي ايكي آياق چيخارميشدي.
قورد دئدي:‹‹ سن سؤزونون اوستونده دورمادين.››
قورباغا بالاسي يالواردي: ‹‹باغيشلا مني...اؤز اليمده دئييل دي كي...من بو آياقلاري ايستميرم...
من يالنيز اؤزومون گؤزل گؤي قورشاقيمي ايسته ييرم.››
قورد ايسه دئدي :‹‹ منده اؤزومون پارلاق قارا شووه مي ايسته ييرم سؤز وئر بير داها دگيشمه يه جكسن››
قورباغا بالاسي دئدي: ‹‹سؤز وئريرم››
آمما فصيل لر نئجه دگشيلر كيمي ، قورباغا بالاسي ده دگشيلدي .او ايكي ال چيخارميشدي.
قورد آغلادي :‹‹بو ايكينجي يول دور سؤزوندن چيخيرسان››
قورباغا بالاسي يئنه يالواردي:‹‹مني باغيشلا ؛ سئوه سئوه اولمادي كي...من بو اللري ايسته ميرم...
من اؤزومون گؤزل گؤي قورشاقيمي ايسته ييرم.››
قورد دئدي:‹‹ من ايسه اؤزومون قارا پارلاق شووه مي ... بو سون يول دور سني باغيشلاييرام.››
قورباغا يئنه سؤزونون اوستونده دايانامادي. او دگيشدي.
بو كز اونلار بير بيرلرين گؤرنده قورباغا نين قويروقو يوخويدو.
قورد دئدي:‹ سن اوچ يول سوزوندن كئچميسن. ايندي داها منيم اوره گيمي سينديردين››
قورباغا دئدي:‹‹ سن منيم گؤزل گؤي قورشاقيم سان آخي...››
قورد دئدي: ‹‹دوزدور؛ آنجاق سن داها منيم پارالاق قارا شووه م دئييلسن... گوله گوله››
قورد سؤيود آغاجينا قالخدي او قدر اؤزونه آغلادي يوخويا گئتدي
بير ايستي آيلي گئجه يوخوسوندان اوياندي.
گؤي دگيشميشدي
آغاجلار دگيشميشديلر.
اؤزوده دگيشيلميشدي.
آنجاق اورگي دگيشمه ميشدي او هله قورباغا بالاسين سئويردي.
سويود آغاجي سويا يئتيشن يئرده
بير قورباغا اوه ليك ياپراقينين اوستونده اوتورموشدو
كپنك دئدي:‹‹ باغيشلايين سيز منيم قارا...››
آمما ‹‹پارلاق شووه مي گؤرمه ديزمي؟››دئمكدن اؤنجه قورباغا آتيليب اونو اوتدو.
بوتونلوكله ايچري بوراخدي.
ايندي قورباغ اورادا يول گؤزله يير.....
گؤزل گؤي قورشاغين خاطيرلايير
بيلمه يير هارايا گئديب.