قاضي و خوروز
قديم زامانلاردا، قاضينين حیطينده
بير خوروز واریدی. بير گون حیطده ائشهلنرکن، خوروز بير (قارا پول) تاپیر. خوروز
پولو ديمديیينده گوتوروب حیطين اورتاسینا قویور و بانلاماغا باشلاییر:" قوقولوقو
بير دنه پول تاپمیشام! "قاضي آداملارینی گوندهردي، پولو خوروزدان آلدیلار.
خوروز یئنه بانلادی: "قوقولوقو، قاضي منه موحتاج ايميش".
قاضي آداملارینا دئدي: "آپارین خوروزون پولونو قایتارین".
خوروز پولو آلیب یئنه بانلاماغا باشلادی: "قوقولوقو، قاضي مندن قورخموش!"
قاضي یئنه اوز آداملارینا دئدي: "بو خوروز مني تنگه گتيردي. گئدين، باشینی کسين، بيشيريب پيلوو اوستونه قویون. اونو یيیهجهیم".
خوروزون باشینی کسنده او یئنه برکدن بانلاییب دئدي: "قوقولوقو نه ايتي پیچاقمیش!"
خوروزون باشینی کسندن سونرا قازانا سالیب بيشيريبلر. خوروز قازاندا دا بانلادی "قوقولوقو، نه ايستي حامامچادیر!"
پيلووو بير بویوک نيمچهیه چکيب خوروزو اوستونه قویدولار. خوروز بانلادی: "نه آغجا تپهدير!"
قاضي خوروزو پارچالاییب یئمهیه باشلادی. اونو چئینهیيب اوداندا خوروز بانلادی: "نه دارجا کوچهدير!..
خوروز پيلوو قاریشیق قاضينين قارنینا دوشنده بير ده بانلادی: "قوقولوقو نه لئهمه درهدير!"
قاضي او قدر یئدي کي، قارنی پارتلادی. خوروز قاضينين قارنیندان چیخیب بانلادی: "قوقولوقو، قاضينين قارنی ییرتیلدی! منيم جانیم قورتاردی!"