شعر
یالان دیر
کؤنول نفسین اؤلدورمه میش ریاضت ده یالان دیر
حرام مالدان احسان اولماز سخاوت ده یالان دیر
بیر اینسانین اؤزنفسینده گر لیاقت اولماسا
دده-بابا سولطان اولسا نجابت ده یالان دیر
کیچیک لره تعلیم ائیله بؤیوک لره احترام
یوخسوللارین حالین یوخلا دوشگونلره وئر سلام
یارادانا قوللوق ائله ، خلقه خدمت والسلام
اگر قصدین شهرت اولسا او خدمت ده یالان دیر
بیر آی اوروج ،بئش واخت ناماز، الده تسبیح سجاده
گئجه-گوندوز ذکر ائده سن حاجا گئدسن پیاده
شیطانا یوز داش آتاسان قوربان کسه سن میناده
کؤنلونده بیر رحم اولماسا عبادت ده یالان دیر
دده کاتیب دورما چالیش نه قدر وار اختیار
ایشله، قازان بویون اگمه،ایش دیر سنه افتیخار
گرچی زرق مقدردیر آما حرف آشکار
چالیشماسان روزی یئتمز او قسمت ده یالان دیر
فکری ناقص
دونیا بیر کؤلگه یه بنزر گون دؤننده زایل اولو
عقل-فکیری ناقص انسان دونیایا چوخ مایل اولو
دونیا بیر یوخودور اینان یاتیب رؤیا گؤرور اینسان
عیش-عشرت،سفره الوان آییلاندا باطل اولو
دونیا امتحان یئری دیر هر کسه مهمان یئری دیر
بیر گئجه کاروان یئری دیر صاباح اولجاق راحل اولو
دده کاتیب اویما، آیین فرصت گئتمه میش آل پایین
اندازه بیل قاتما سایین انسان اوغلو عاقل اولو
کؤلگه سیز
ده لی کؤنول نئچه جمله ائیله بیان کؤلگه سیز
یارادان امانت وئریب جسدده جان کؤلگه سیز
کایناتی او یارادمیش معنویدن-ماددیدن
ایشیغین وئرمه میش جهانا شمس تابان کؤلگه سیز
عقل یئتمز حکمتینه سن بیر علم اللهه باخ
کؤلگه نوردان ایجاد اولار بوتون خلق اللهه باخ
منصور حلاج نه دئدی فناء فی اللهه باخ
نور حق ظاهر اولاندا اولار هریان کؤلگه سیز
ملائکه نوردان یارانیب جیسمه خلاف بیل یقین
عین عیان ، نطق بیان ، آب شفاف همچنین
مومن لرین کؤنلو آیدین آینه ی صاف همین
دریالاردا موج روان ، باد- طوفان کؤلگه سیز
دده کاتیب گز جهانی دققته آل هر یانی
ارض و سما ، کهکشانلار فکره سالیر انسانی
جبراییلا گه تدی رسولا حق یانیندان فرمانی
اوخونور اینسانلیق درسی حکم قرآن کؤلگه سیز
طوطی
بو گون عجب بیر قوش گؤردوم
آدین سوردوم همن طوطی
افسوس سنین مصاحبین
اولوب زاغ - زغن طوطی
عربجه بوبغادیر ایسمین
یارادان خوش چکیب رسمین
دیلین اینسان قوش دو جسمین
فارسی شکرشکن طوطی
طوطا مرغ هندوستانسان
استانبولدا پاپاغان سان
سن آزاد اهل اورمانسان
یوخ کی زیندان مسکن طوطی
دده کاتیب نه بحثده سن
نه غوغادا نه سسده سن
حاییف باغلی قفسده سن
نه سن آزاد نه من طوطی
تاماشا
بئش گون یاز باهارا آلدانان اینسان
یازین گتسه قیشیندادیر تاماشا
مغرور اولوب قورولوقدا آت قووان
باتلاقلارا دوشنده دیر تاماشا
زامان دؤنر هر واخت بوگون اولانماز
قوجالیقا لقمان چاره بولانماز
سیندین کئچر قان داماردا دولانماز
آیاقلارین شیشنده دیر تاماشا
گوونمه گوجونه بوکولر بئلین
توکنر آیلارین قورتولار ایلین
تؤکولر دیشلرین دوز دئمز دیلین
پلتک ووروب چاشاندادیر تاماشا
دده کاتیب گولوسیتانین سولاندا
حق صاحیبی امانتی آلاندا
جانسیز جسد تورپاق آلتدا قالاندا
یئر قوردلاری دئشنده دیر تاماشا
لامی هئی
اوخودوم الیفی ائله دیم ازبر
درسیم اولدو الیف اوسته لامی هئی
ب بسم الله ت توکل ث ثنا
ج جمالین ح حیاتدی لامی هئی
خ خالیق یاراتدی قددیم دال اولدو
ذ ذبیح مناده عجب حال اولدو
ر رجیم آدمه ز زوال اولدو
باش توتدو سیمایه دئدی لامی هئی
س سخاوت دؤرد ایچینده آدی وار
ش شفق آچیلدی صبح اولدوم بیدار
ص صلوات پیغمبره شفادار
ض ضلالت چکمز دئدی لامی هئی
ط طهارت هر کیتابدا ابتدا
ظ ظهور ایئله دی آیات خدا
ع نه لر گؤروندو عرش علادا
غین غنی حق اؤزودور لامی هئی
ف فکیر ائله قاف قلم یازدی عیان
ک کلامدا لام اوخوندو لامکان
م محمد ن نوحا اولدو طوفان
و واللاهی لن ترانی لامی هئی
کاتیب امداد ایسته هئیدن هوالهو
ی تکین آخردا قالدیم آمان هو
حقی سئون نه غم چکر نه قیهو
لام الف لا ، اول آخر لامی هئی