بالاجا- دایچا
دایچا
من چوخ هوشلو خوخانام. حئیوانلارین چوخونو یاخشی تانیییرام بعضیلرینی یاخیندان گؤرموشم، بعضیلرینی تلوزیوندا. جیققیلی حئیوانلار چوخ دوزلو اولورلار آما من یئکه حئیوانلاری داها چوخ سئویرم. همیشه اؤزمه دئییرم کاش من ده بؤیوینده آت اولوب چؤللرده قاچایدیم. آما بیلیرم کی یئکه خوخان اولاجاغام. بالاجا خوخان بؤیوینده یئکه خوخان اولور، قوزو بؤیوینده قویون یا قوچ اولور، دایچا دا بؤیوینده آت اولور. آنا خوخانا دئییرم:« کاش من بالاجا خوخان یئرینه دایچا اولایدیم.
- دایچا؟ هله نیه دایچا؟
- هیم آنا! دایچا اولسایدیم حیطده کیشنهییب اویان بو یانا قاچاردیم. گؤر قشنگ اولاردی!»
آتام دئییر:
« هئچ ناراحات اولما قیزی بالام! سن ائله بالاجا خوخانلیقدا دا بیر دایچا قدر اویان بویانا قاچیرسان!
- تک ایندی دئییل کی آتا! گؤیلوم ایستیر بؤیوینده ده آت اولام!
آتام گوله گوله دئییر:
دور بیر قاچ گؤروم آت اولابیلرسن یا یوخ.
آتام شوخلوق ائلییر آما منیم گؤیلومه قاچماق دوشوب، دوروب ائوین بو باشیندان او باشینا قاچیرام: ائهئئئ هئئئئ! ائهئئئ هئئئ!
گیلاس
باخ، بو آغاج گیلاسدی،
ياز گلدی بو آغاجین
بوداغیندان گول آسدی.
سونرا گوللر بوکولدو،
لچکلری تؤکولدو.
ياشیل – ياشیل دويمهلر
بؤيودو گیلاس اولدو.
سیرغا – سیرغا دامجیلار
بوداقلاردان آسیلدی.